HUGHES, RICHARD SAMUEL (1888 - 1952), gweinidog (MC) ac athro

Ganwyd 18 Mehefin 1888, yn Nhanycelyn, Rhostryfan, Sir Gaernarfon, mab Samuel a Mary Hughes. Ar ôl y cwrs arferol yn ysgol elfennol ei bentref bu am rai blynyddoedd yn gweithio mewn masnachdy, ac oddi yno aeth i ysgol Clynnog â'i fryd ar y weinidogaeth. Enillodd ysgoloriaeth i Goleg y Brifysgol, Aberystwyth (lle graddiodd yn y celfyddydau), a graddiodd mewn diwinyddiaeth yn y Coleg Diwinyddol, Aberystwyth. Ordeiniwyd ef yn 1918, gweinidogaethodd yng Nghalfaria, Porth, Morgannwg (1918-22), Fourcrosses, Llŷn (1922-24), a'r Garreg-ddu, Blaenau Ffestiniog (1924-30). Galwyd ef yn 1930 i Goleg Clwyd, Rhyl, a bu yno hyd ei farwolaeth, yn athro i gychwyn (dan y Parch R. Dewi Williams), ac am 13 blynedd yn brifathro. Cafodd gryn ddylanwad ar fwy nag un to o fyfyrwyr a fu tan ei ofal yno. Yn 1919 priododd Jane Morris Jones, merch William Morris Jones (cadeirydd cyngor sir Arfon yn ei ddydd); ganwyd mab a merch o'r briodas. Bu farw 16 Ebrill 1952. Cyfrifid ef yn bregethwr praff, o anian broffwydol. Ymhyfrydodd mewn beirniadaeth ysgrythurol a phynciau diwinyddol. Cyhoeddwyd gwerslyfr o'r eiddo ar Efengyl Mathew yn 1937.

Awdur

• Y Parchedig Gomer Morgan Roberts, (1904 - 1993)

Ffynonellau

• Y Goleuad, 23 Ebrill a 7 Mai 1952
• Blwyddiadur y Methodistiaid Calfinaidd, 1953, 228
• gwybodaeth gan ei fab, yr Athro Meredydd G. Hughes, Birmingham

Dolenni Ychwanegol

• Wikidata: Q20804752

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/