OWEN, DAVID SAMUEL (1887 - 1959), gweinidog (MC)

Ganwyd 12 Mawrth 1887 yn Rhuthun, Dinbych, mab Samuel a Harriet Owen. Addysgwyd ef yn ysgolion elfennol Rhuthun ac Abergele; ysgol sir Abergele; Coleg y Brifysgol, Bangor (lle graddiodd yn y celfyddydau); a Choleg Diwinyddol Aberystwyth. Dechreuodd bregethu yn 1905 ym Methlehem, Bae Colwyn. Ordeiniwyd ef yn 1913, a bu'n weinidog yn Siloh, Llanelli (1913-15) cyn ei alw i eglwys Jewin, Llundain, a chael gyrfa lwyddiannus yno hyd ddiwedd ei oes. Er mawr ofid iddo dinistriwyd capel hardd Jewin gan fomiau'r gelyn yn ystod Rhyfel Byd II, a dychwelodd llawer o'r aelodau i Gymru. Er hynny daliodd ati'n ddygn gyda'r gweddill, eithr ni chafodd fyw i weld codi addoldy newydd ar sylfaen yr hen. Priododd, 1913, Gracy Jones, Glan Conwy; ganwyd iddynt ddau fab a thair merch. Bu farw 26 Mawrth 1959, a chladdwyd ef ym mynwent Bron-y-nant, Bae Colwyn.

Yr oedd yn bregethwr grymus a phoblogaidd, a galw mawr am ei wasanaeth yng Nghymru. Bu'n llywydd Sasiwn y Gogledd (1954). Rhagorodd er yn ieuanc fel adroddwr ar lwyfannau eisteddfodol, a bu'n beirniadu 'n gyson ar hyd y blynyddoedd ar gystadleuthau adrodd yn yr Eisteddfod Genedlaethol

Awdur

• Y Parchedig Gomer Morgan Roberts, (1904 - 1993)

Ffynonellau

• Who was who?, 1921, 347
• Y Goleuad, 1, 8 a 22 Ebrill 1959
• Y Drysorfa, Medi 1959
• Blwyddiadur y Methodistiaid Calfinaidd, 1960, 270-271
• G. M. Roberts, Y ddinas gadarn. Hanes Eglwys Jewin, Llundain (Llundain 1974), penodau 9-10
• adnabyddiaeth bersonol

Darllen Pellach

• Huw Edwards, City Mission: The story of London's Welsh chapels (Talybont 2014)

Dolenni Ychwanegol

• Wikidata: Q20738041

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/