PHILLIPS, PHILIP ESMONDE (1888 - 1960), Islyngesydd

Ganwyd 16 Mehefin 1888 yn fab iau i P. S. Phillips, Crumlin Hall, Mynwy Priododd yn 1933 Mrs Ellinor Curtis, merch Capten Glen Kidston (terfynwyd y briodas yn 1950); bu iddynt un mab. Addysgwyd Phillips yng Ngholeg Britannia y Llynges Frenhinol, Dartmouth. Dyfarnwyd iddo y D.S.O. a bar yn ystod Rhyfel Byd I. Yn 1927 aeth yn Benswyddog Staff Is-lyngesydd y Llongau Tanfor. O 1935 hyd 1937 bu'n Ail Aelod Bwrdd Llyngesol y Gymanwlad. O 1937 hyd 1938 bu'n Bennaeth Staff a Chapten Gofalaeth y Nore. Gosodwyd ef ar Restr yr Ymddeolwyr yn 1938 fel capten. Y flwyddyn ganlynol penodwyd ef yn A.D.C. i'r Brenin. Gyda chychwyn Rhyfel Byd II yn 1939 galwyd ef yn ôl i wasanaeth gweithredol fel islyngesydd, a gwasanaethodd yn gyntaf yn Flag Officer Aberdaugleddau, ac wedyn yn Swyddog Hŷn y Llynges Brydeinig yn Nhrinidad. Ymddeolodd yn 1945 ac fe'i penodwyd yn C.B. Bu'n Ddirprwy Raglaw dros sir Frycheiniog. Ymgartrefodd yn Woodberry Cottage, Itchester, Sussex, a bu farw 27 Chwefror 1960 yn ysbyty Chichester.

Awdur

• Donald Moore

Ffynonellau

• Who was who?
• The Navy List (Llundain 18--)

Dolenni Ychwanegol

• Wikidata: Q20734153

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/