THOMAS, LEWIS JOHN (1883 - 1970), cenhadwr yn yr India dan Gymdeithas Genhadol Llundain

Ganwyd 2 Chwefror 1883 yn Llangefni, Môn, yn fab Cefni a Mary (ganwyd Williams) Thomas. Symudodd y teulu pan oedd ef yn 5 oed i Riwbryfdir, Blaenau Ffestiniog. Wedi cyfnod fel disgybl-athro a gweithio ar y rheilffordd, symudodd i Gorwen ac yna i Benbedw. Yno daeth dan ddylanwad diwygiad 1904-05 a dechreuodd bregethu. Bu'n awyddus i fod yn genhadwr er yn ifanc.

Wedi bod yng Ngholeg Paton, Nottingham, ordeiniwyd ef yn Jerwsalem, Blaenau Ffestiniog, 12 Hydref 1911. Hwyliodd i'r India 4 Tachwedd 1911. Llafuriodd yn galed fel arolygwr nifer fawr o eglwysi yn y taleithiau lle siaredid Telugu. Ar ôl priodi â Hannah E. Mathews ym Madras, buont yn byw yn Cuddapah, Kamalapuram, Goety a Jammalamadugu. Ganed mab a merch iddynt. O 1927 hyd 1938 bu'n gyfrifol am seminâr i hyfforddi efengylwyr brodorol. O 1939 hyd 1949 bu'n ysgrifennydd-drysorydd i'r Gymdeithas Genhadol. Fel Annibynnwr digyfaddawd, bu'n wrthwynebydd i'r Eglwys Unedig er rhoi ei orau ymhob cydweithio.

Ymddeolodd yn 1949 o'r gwaith cenhadol ond derbyniodd ofalaeth eglwys Bresbyteraidd St. Andrews, Bangalore, lle'r oedd eu mab, Iorwerth, yn genhadwr a phennaeth ysgol ramadeg i fechgyn.

Collodd ei olwg yn 1954. Bu ei briod farw 13 Mai 1964 a bu yntau farw 17 Ebrill 1970 yn Bangalore lle claddwyd hwynt.

Awdur

• Y Parchedig Huw Ethall

Ffynonellau

• Ymchwil bersonol

Dolenni Ychwanegol

• Wikidata: Q20821189

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/