DAVIES, DAVID JOSHUA (1877 - 1945), dramodydd

Ganwyd yn Troed-y-rhiw, Llanwenog, 26 Rhagfyr 1877 yn fab i John Davies a Mary (ganwyd Evans) ei wraig. Cafodd ei addysg yn ysgol gynradd Mydroilyn ac ysgol 'tutorial' Ceinewydd. Bu bron â cholli ei olwg yno, ond wedi'i adfer aeth yn brentis i siop 'ironmonger' yn Abertawe. Yn 1910 cymerodd dyddyn, ac yn ddiweddarach y siop a'r swyddfa bost, ym Mhont-rhyd-y-groes, lle treuliodd weddill ei oes. Priododd ag Annie Davies o Geinewydd yng nghapel St. Paul, Aberystwyth, 6 Ebrill 1904 a chodi teulu o bedwar o blant. Daliodd swyddi pwysig yn ei enwad (Y Wesleaid) a'r cyngor sir lle daeth yn gadeirydd y pwyllgor addysg. Ysgrifennodd lawer i'r wasg leol ar bynciau gwleidyddol, ond ei fri mwyaf oedd ennill y wobr yn Eisteddfod Genedlaethol Castell-nedd 1918 am ei ddrama Maes y Meillion. Erys ei ddrama Owen Glyndŵr heb ei chyhoeddi. Bu farw 8 Ionawr 1945 a chladdwyd ef yng Ngheinewydd.

Awdur

• Gwilym Richard Tilsley, (1911 - 1997)

Ffynonellau

• Gwybodaeth gan ei ferch, Mrs. J. T. Owen
• gwybodaeth bersonol

Dolenni Ychwanegol

• Wikidata: Q20732851

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/