DAVIES, JOHN LLEWELYN (1826 - 1916), cyfieithydd, caplan, ac un o ddringwyr cynnar mwyaf llwyddiannus yr Alpau

Mab John Davies, offeiriad ac athronydd. Yr oedd yn gymrawd o Goleg y Drindod, Caergrawnt, 'Hulsean Lecturer' yn y brifysgol honno, 'Lady Margaret Preacher' yn Rhydychen, yntau hefyd yn pwysleisio pwysigrwydd cwestiwn addysg uwch i ferched, a chyfaill Frederick Denison Maurice; y mae'n adnabyddus iawn fel cyd-gyfieithydd Gwladwriaeth Platon.

Yr oedd yn un o 31 aelod gwreiddiol y Clwb Alpaidd ac yn un o ddringwyr cynnar mwyaf llwyddiannus yr Alpau. Ef, gyda'r tywysydd Johann Zumtaugwald a thywysyddion eraill, oedd y cyntaf i ddringo'r Dom (14,942 tr.), y mynydd uchaf a berthyn i'r Swistir yn unig (hyn ar 11 Medi 1858) ac, yn 1862, y Täsch-horn (14,700 tr.). Esgynnodd y Finsteraarhorn mor gynnar â 29 Awst 1857. Dim ond un ysgrif ar fynydda a gyhoeddodd, ' An ascent of one of the Mischabel-Hörner, called the Dom ' (Peaks, passes and glaciers, cyfres gyntaf, 1859) ond yr oedd yn fawr ei barch gan Leslie Stephen, ysgrifwr mynydd gorau'i gyfnod, a fu'n ddisgybl iddo.

Awdur

• Dr Ioan Bowen Rees, (1929 - 1999)

Ffynonellau

• Oxford Dictionary of National Biography, 1912 -21, 147
• A. L. Mumm, The Alpine Club register, 1857-1863 (Llundain 1923), 85-7
• Alpine Journal, 30, 324-30

Dolenni Ychwanegol

• VIAF: 59216257
• Wikidata: Q18762028

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/