JONES, EDWARD ALFRED (1871 - 1943), arbenigwr ar lestri arian

Ganwyd 1871 yn un o bedwar o blant Thomas (bu farw 1877) a Mary Jones, tafarn Cross Keys, Llanfyllin, Trefaldwyn. Symudodd y fam i Borthmadog (c. 1895) a Phwllheli (c. 1910). Cafodd y mab addysg breifat cyn ymuno â'r Ffiwsilwyr Brenhinol Cymreig ond ni ddilynodd y llwybr hwnnw ac ymddiswyddodd o'r fyddin. Magodd ddiddordeb dwfn mewn hen bethau aur ac arian. Dechreuodd ysgrifennu i'r Cymmrodor ac Archaeologia Cambrensis yn 1904 a bu'n gyfrannwr cyson hyd ddiwedd ei oes i gylchgronau fel y Burlington Magazine (e.e. ' Some old silver plate in the possession of Lord Mostyn ', 1907), Connoisseur (e.e. ' Welsh goldsmiths ', 1941), Apollo, Athenaeum ac Art in America. The church plate of the diocese of Bangor (1906) oedd ei gyfrol gyntaf a dilynwyd hon yn fuan gan nifer o gyfrolau a chatalogau yn ymdrin â thrysorau aur a llestri arian eglwysi Lloegr ac Ynys Manaw, a cholegau Caergrawnt a Rhydychen, y casgliad brenhinol yn Nhŵr Llundain, a llawer o gasgliadau preifat. Mynychodd amgueddfeydd a chartrefi ar y Cyfandir, Rwsia a Thaleithiau Unedig America a chyhoeddi ffrwyth ei astudiaeth yn The old English plate of the Emperor of Russia (1909), The old silver of American churches (1909), Old silver of Europe and America, from early times to the nineteenth century (1928) a chyfrolau eraill. Gwnaed ef yn Athro cynorthwyol mewn celfyddyd gain ym Mhrifysgol Iâl, T.U.A. a derbyniodd radd M.A. er anrhydedd gan bedair prifysgol (Cymru; 1918); etholwyd ef yn gymrawd nifer o gymdeithasau ysgolheigaidd; derbyniodd ryddfraint dinas Llundain; a gwnaed ef yn aelod o Orsedd y Beirdd. Bu farw yn Llundain 23 Awst 1943 yn fab gweddw.

Awdur

• Dr Mary Auronwy James

Ffynonellau

• Who was who?
• Y Casglwr pob peth printiedig, 32, Awst 1987, 18-9
• Mynegeion cofrestri geni, priodi a marw Cymru a Lloegr yr 'Office of Population and Census Studies', Gorffennaf - Medi 1871

Dolenni Ychwanegol

• VIAF: 42218438
• Wikidata: Q16943691

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/