REES, WALTER ENOCH (1863 - 1949), contractiwr ac ysgrifennydd hiroesog Undeb Rygbi Cymru

Ganwyd 13 Ebrill 1863 yng Nghastell-nedd, Morgannwg, yn fab i Joseph Cook Rees, adeiladydd a chontractiwr. Addysgwyd ef yng Nghastell-nedd a Barnstaple. Dechreuodd ei yrfa hirfaith fel gweinyddwr rygbi yn 1888 pan ddaeth yn ysgrifennydd clwb Castell-nedd. Etholwyd ef i bwyllgor Undeb Rygbi Cymru yn 1889, ac yn 1896 olynodd William Henry Gwynn (Abertawe) fel ysgrifennydd yr Undeb. Ni roes neb wasanaeth hwy i U.R.C. nag ef. Yr oedd ei ddylanwad a'i awdurdod yn ddihareb, yn arbennig yn ne Cymru. Etholwyd ef i gyngor tref Castell-nedd yn 1900, ac yn faer yn 1905. Penodwyd ef yn gyd-reolwr tîm rygbi Prydain i Dde Affrica yn 1910. Rhoddwyd iddo'r teitl ' Capten ' gan y Swyddfa Ryfel er cydnabyddiaeth o'i waith fel swyddog recriwtio yng ngorllewin Morgannwg yn 1916. Ar ôl gwasanaeth yn ymestyn dros hanner canrif, ymddeolodd o fod yn ysgrifennydd U.R.C. yn 1948. Priododd, 8 Medi 1898, Lizzie Leith Peters o Aberdeen, a bu iddynt o leiaf un mab ac un ferch. Bu farw 6 Mehefin 1949 ym Mhen-y-bont ar Ogwr.

Awdur

• Yr Athro Gareth W. Williams

Ffynonellau

• David Smith a Gareth Williams, Fields of Praise. The official history of the Welsh Rugby Union 1881-1981 (Caerdydd 1980) (1980)
• Playfair Welsh Rugby Annual 1949-50 (Llundain 1949)
• Neath Guardian, 10 Mehefin 1949

Dolenni Ychwanegol

• Wikidata: Q7964728

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/