ADAMS, ROGER (bu farw 1741), argraffydd yng Nghaer

Cafodd ryddfreiniad dinas Caer ar 20 Chwefror 1713-4. Er nad oes sicrwydd bod Roger Adams yn Gymro caiff ei grybwyll yma am ei fod gyda'r cyntaf i argraffu llyfrau a baledi Cymraeg yng Nghaer. Ei lyfr Cymraeg cyntaf, y mae'n bosibl, ydoedd Ystyriaethau o Gyflwr Dyn, 1724. Yn 1730 dechreuodd argraffu newyddiadur a ddaeth yn adnabyddus ac a ddarllennid yng Ngogledd Cymru, sef Adams's Chester Weekly Courant. Efe, hefyd, a argraffodd John Reynolds, The Scripture Genealogy and Display of Herauldry, 1739. Wedi ei farw bu ei weddw, ELIZABETH ADAMS, yn dwyn y busnes ymlaen. Hyhi a argraffodd Cydymaith Diddan (Dafydd Jones o Drefriw), 1766; argraffodd hefyd, e.e. yn 1752 a 1753, lawer o faledi.

Awdur

• Syr William Llewelyn Davies, (1887 - 1952)

Ffynonellau

• Morris Parry, 'Chester Welsh Printing,' yn Journal of the Architectural, Archaeological and Historic Society of Chester and North Wales, 1915, a Gwasg Gymraeg Caerlleon (Caerlleon 1931)
• Ifano Jones, A history of printing and printers in Wales to 1810, and of successive and related printers to 1923 (Cardiff 1925)
• J. H. Davies, A Bibliography of Welsh Ballads printed in the 18th century (London 1908-11)

Dolenni Ychwanegol

• Wikidata: Q18922262

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/