AELHAEARN (7fed ganrif), nawdd-sant

Yn ôl rhestrau'r saint yr oedd yn fab Hygarfael, mab Cyndrwyn o Lystin Wennan (Moel Feliarth yn awr) ym mhlwyf Llangadfan, Sir Drefaldwyn. Iddo ef y priodolir sefydlu Cegidfa, Llanael-haearn, a chapel arall o'r un enw nad ydyw mewn bod yn awr ond a gynrychiolir gan Gwyddelwern. Cofir am ei enw, a geir yn aml ar y ffurf Elhaearn, yn Ffynnon Aelhaearn, ffynnon sanctaidd y credid gynt fod rhinwedd gwella yn ei dyfroedd; heddiw rhydd ddwr i bentref Llanaelhaearn. Tachwedd 1 yw dydd gwyl Aelhaearn. Ni wyddys ddim o'i hanes, eithr y mae'r cyflwyniadau eglwysig yn ein tueddu i gredu'r farn ei fod yn un o ddisgyblion Beuno.

Awdur

• Syr John Edward Lloyd, (1861 - 1947)

Ffynonellau

• Baring-Gould a John Fisher, The Lives of the British Saints: the saints of Wales and Cornwall and such Irish saints as have dedications in Britain, i, 109-12

Darllen Pellach

• Erthygl Wicipedia: Aelhaearn

Dolenni Ychwanegol

• Wikidata: Q18593818

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/