BARNES, EDWARD, bardd a chyfieithydd llyfrau crefyddol yn ail hanner y 18fed ganrif

Ganwyd yn Llanelwy, a bu'n athro ysgol yno. Yn ôl Josiah Thomas Jones yn Geiriadur Bywgraffyddol o Enwogion Cymru trodd yn Fethodist, a bu fyw am flynyddoedd yn Sir Drefaldwyn, a chroesawai yno bregethwyr teithiol i'w dy.

Ceir dwy garol blygain o'i waith ynghyd a cherdd yn erbyn medd-dod a cherdd yn erbyn bydol chwantau yn Cyfaill i'r Cymro, sef casgliad William Hope, Mostyn, a argraffwyd yng Nghaer yn 1765. Yn NLW MS 843B , a gopiwyd tua 1761, ceir cyfres o englynion ganddo i Dduw. Cyhoeddwyd yn 1784 ei gyfieithiad o'r Llythyr o Gyngor difrifol… gan De Courcy, yn 1785 y Myfyrdodau a Sylwadau gan Iago Herfei (sef James Hervey), ac yn 1792 ei gyfieithiad o bregeth Theophilus Priestley ar farwolaeth Selina, iarlles Huntingdon. Argraffwyd yng Nghaerlleon yn 1795 y Patrwm dewisol rannau o ganiadau y Parchedig Rees Prichard … ar ddull Geirlyfr Cymraeg a Saesneg gan Edward Barnes, Athraw Ysgol yn Caerwys. Copi o hwn yw NLW MS 1477B , ac arno mewn inc fe newidiwyd y dyddiad i 1797, a 'Caerwys' i 'Lanelwy.'

Awdur

• David Myrddin Lloyd, (1909 - 1981)

Ffynonellau

• H. Blackwell, NLW MSS 9251-9277A: A Dictionary of Welsh Biography
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 19
• Llyfryddiaeth y Cymry (Llanidloes 1869)

Darllen Pellach

• T. Morgan, Enwogion Cymreig 1700-1900 (1907), t.17

Dolenni Ychwanegol

• Wikidata: Q20732926

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/