BREWER, JEHOIADA (1752 - 1817), gweinidog gyda'r Annibynwyr ac emynydd

Ganwyd tua 1752 yng Nghasnewydd-ar-Wysg. Ar gymhelliad gweinidog gydag enwad yr arglwyddes Huntingdon aeth i goleg Trefeca, ac ar gyfrif hynny nis derbyniwyd am urddau eglwysig. Ymrôdd i bregethu yn nhueddau Bath, a daeth hefyd yn hynod boblogaidd ym Mynwy. Bu'n gweinidogaethu yn Rodborough (Swydd Gaerloyw) a Sheffield (Queen-street), 1783-95. Yn 1795 ymsefydlodd yn weinidog capel Carr's Lane, Birmingham, ar ôl y Dr. Edward Williams, Rotherham. Arweiniodd blaid allan o Carr's Lane yn 1802, i Livery-street. Bu farw 24 Awst 1817, a hwythau wrthi'n codi capel newydd yn Steel-house Lane iddo. Cyhoeddwyd rhai o'i bregethau a daeth rhai o'i emynau yn dra phoblogaidd, megis 'Hiding Place' a 'Star of Bethlehem' a droswyd yn Gymraeg.

Awdur

• Y Parchedig Richard Griffith Owen, (1890 - 1973)

Ffynonellau

• Geirlyfr Bywgraffiadol o Enwogion Cymru (1870), 74
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 42
• Oxford Dictionary of National Biography
• Miall, Congregationalism in Yorkshire a chapter of modern church history (1868)
• James, The History of Protestant Nonconformity in Birmingham (1850)
• Transactions of the Congregational Historical Society, i, 333, viii, 165

Dolenni Ychwanegol

• VIAF: 2360325
• Wikidata: Q6176481

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/