CARTER, ISAAC (bu farw 1741), argraffydd a gaiff y clod o sefydlu'r wasg argraffu barhaol gyntaf yng Nghymru

Sefydlodd Carter ei wasg yn Atpar (a elwid hefyd yn ' Trefhedyn') ym mhlwyf Llandyfriog, Sir Aberteifi, sef yn y rhan honno o dref Castellnewydd Emlyn sydd ar ochr Sir Aberteifi i afon Teifi. Yn 1718 y daeth y pethau cyntaf allan o'r wasg, sef dwy faled - Cân o Senn i'w hen Feistr Tobacco, gan Alban Thomas, a Cân ar Fesur Triban ynghylch Cydwybod a'i Chynheddfau, y ddau gyhoeddiad yn nodedig o brin (copïau yn Ll.G.C.). Daeth tri gwaith arall o wasg Adpar (Trefhedyn), sef Eglurhad o Gatechism Byrraf y Gymanfa, 1719, Dwysfawr Rym Buchedd Grefyddol, 1722, a Y Christion Cyffredin … 1724.

Trosglwyddwyd y wasg i dref Caerfyrddin c. 1725, ac oddi yno y cafwyd Maddeuant i'r Edifairiol, 1725, Gwaith a Gwobr Ffyddlon Weinidogion yr Efengyl, 1729, Llythyr Bugeilaidd, 1729, Y Cyfrif Cywiraf o'r Pechod Gwreiddiol, 1730, Tarian Cristnogrwydd, 1733.

Priododd Carter Ann Lewis yng Nghenarth ar 11 Ionawr 1721; claddwyd ef yn eglwys S. Pedr, Caerfyrddin, ar 4 Mai 1741.

Awdur

• Syr William Llewelyn Davies, (1887 - 1952)

Ffynonellau

• Ifano Jones, A history of printing and printers in Wales to 1810, and of successive and related printers to 1923 (Cardiff 1925)
• Journal of the Welsh Bibliographical Society, i, 129-32
• J. H. Davies, A Bibliography of Welsh Ballads printed in the 18th century (London 1908-11)

Darllen Pellach

• Erthygl Wicipedia: Isaac Carter

Dolenni Ychwanegol

• Wikidata: Q13129276

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/