CHRISTOPHER, JACOB (fl. 1655-1690), pregethwr gyda'r Annibynwyr

Y mae profion y cydnabyddid ef fel pregethwr cyn yr Adferiad yn 1660, ond heb ei neilltuo'n swyddogol at y gwaith; lluddiwyd ef rhag pregethu o gwbl ('silenc'd' yw gair Calamy) cyn Deddf Unffurfiaeth 1662, neu o dan dermau'r Ddeddf honno. Yr oedd iddo gyswllt agos â Mawdlam yn ymyl Margam, ac yno y clywir amdano gyntaf; cafodd ef a Lewis Alward o Gynffig eu cyhuddo, ill dau, dan ddeddfau Clarendon o gylch 1664; yn 1672 cafodd Christopher drwydded i bregethu yn nhŷ Alward yng Nghynffig. Enwir ef gan Henry Maurice yn 1675 fel un o henuriaid athrawol eglwys Cilfwnwr (Tirdoncyn). Dywed cofnodion yr eglwys honno iddo farw ar 31 Mai 1690.

Awdur

• Thomas Richards, (1878 - 1962)

Ffynonellau

• Edmund Calamy, An account of the ministers, lecturers, masters, and fellows of colleges and schoolmasters, who were ejected or silenced after the Restoration in 1660. By or before, the Act for Uniformity. (London 1713), ii, 733
• Calendar of State Papers, Domestic Series, 1663-4, 568-9; Entry Book 38A, 197, dogfennau trwydded
• Broadmead Records (1847, 1865) (gol. Underhill), addenda B, 514, Glamorganshire
• Transactions of the Carmarthenshire Antiquarian Society and Field Club, xv, 51

Dolenni Ychwanegol

• Wikidata: Q20733298

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/