DAVIES, BENJAMIN (1826 - 1905), gweinidog gyda'r Bedyddwyr, llenor, ac argraffydd

Ganwyd ym Medi 1826, yn Abergwaun, yn fab i Thomas a Naomi Davies, a bedyddiwyd yno yn 1841. Argraffydd a llyfr-rwymydd oedd, ond dechreuodd bregethu yn 1848, aeth i athrofa Hwlffordd (1851-4), a bu'n weinidog yn y Brymbo (1854-5), Salem, Ffordd-las (1855-7), Birkenhead (1857-61), a Salem, Porth, Rhondda (1861-6). Ailgydiodd yn 1866 yn y gwaith o argraffu a chyhoeddi, ym Mhontypridd. Bu farw 5 Mehefin 1905. Yr oedd yn sgrifennwr toreithiog, yn bennaf ar hanes y Bedyddwyr Cymreig. Ond y gwaith a rydd hawl iddo i le yn y geiriadur hwn yw ei argraffiad (1885) o Hanes y Bedyddwyr Joshua Thomas Yn Gymraeg y cyhoeddodd Joshua Thomas y llyfr; ond wedyn ailsgrifennodd ef yn Saesneg, gyda diwygiadau ac ychwanegiadau o gryn bwys; a chedwid y llawysgrif hon yn athrofa'r Bedyddwyr ym Mryste. Gwnaeth Benjamin Davies gyfieithiad Cymraeg ohoni, gyda rhai ychwanegiadau ganddo ef ei hunan. Yr argraffiad hwn o'r Hanes a ddefnyddir gan chwilotwyr heddiw, gan gynnwys yr ysgrifenwyr yn y geiriadur presennol.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Seren Gomer, 1909, 140 (hunangofiant), 207 (rhestr o'i weithiau)

Dolenni Ychwanegol

• Wikidata: Q20732649

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/