DAVIES, JOSEPH (?- 1831?), cyfreithiwr a sylfaenydd y cylchgrawn Y brud a sylwydd

Ni wyddys dim yn sicr am y gŵr hwn. Dywedir mai yn Llanfair-ym-Muallt y ganwyd ef, ei fod yn gyfreithiwr yn Lerpwl, ac iddo farw yn 1831. Ef a gychwynnodd y cylchgrawn, Y Brud a Sylwydd . Daeth wyth rhifyn ohono allan, rhwng Ionawr ac Awst 1828. O'r trydydd rhifyn ymlaen caed ysgrifau Saesneg yn ogystal â rhai Cymraeg. Yr oedd y golygydd yn credu honiadau ei gyfnod ynglŷn â hynafiaeth yr iaith Gymraeg, ac yr oedd yn dadelfennu geiriau yn y dull a gymeradwywyd gan William Owen Pughe. Yr oedd yn credu hefyd mewn llunio geiriau Cymraeg newydd ar gyfer anghenion yr oes, a dyna brif diddordeb ei gylchgrawn.

Awdur

• Syr Thomas Parry, (1904 - 1985)

Ffynonellau

• Geirlyfr Bywgraffiadol o Enwogion Cymru (1870)
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)

Dolenni Ychwanegol

• Wikidata: Q20733707

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/