DAVIES, JOHN OSSIAN (1851 - 1916), gweinidog gyda'r Annibynwyr ac awdur

Ganwyd yn Pendre, Aberteifi, 10 Tachwedd 1851, yn fab i Daniel a Phoebe Davies. Dechreuodd fel argraffydd a newyddiadurwr, bu'n golygu Y Fellten ym Merthyr Tydfil, a daeth yn ysgrifennydd Cymdeithas Ddirwestol De Cymru. Dechreuodd bregethu ym Merthyr Tydfil ac aeth i Goleg Coffa Aberhonddu (1873). Cafodd ei wahodd i ddilyn William Rees ('Gwilym Hiraethog') yn Lerpwl, eithr dewisodd dderbyn galwad i'r Tabernacl (Cymraeg), Llanelli, 1876. Symudodd yn 1880 i Herbert Place (Saesneg), Abertawe; oddi yno aeth i Tollington Park, Llundain (1883). Yn 1888 aeth i Bournemouth, a thra y bu yno codwyd capel mawr Richmond Hill. Dychwelodd i Lundain yn 1897 i fod yn weinidog Paddington Chapel. Cyhoeddodd bregethau o dan y teitlau - Old yet ever new, 1904, a The Dayspring from on High, 1907. Bu farw 24 Medi 1916, yn Shortlands, Kent.

Awdur

• Y Parchedig Thomas Mardy Rees, (1871 - 1953)

Ffynonellau

• Album Aberhonddu … o'r flwyddyn 1755 hyd 1880 (1898), 281
• The Congregational Year Book, 1917

Dolenni Ychwanegol

• VIAF: 305029536
• Wikidata: Q20733579

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/