DAVIES, ROBERT ('Asaph Llechid,' 1834 - 1858), cerddor

Ganwyd 29 Mehefin 1834 yn y Carneddi, gerllaw Bethesda, mab i David Roberts. Hoffai gerddoriaeth yn blentyn, a rhoddodd ei fryd ar feistroli'r gelfyddyd. Cafodd ei wersi cyntaf gan Robert Moses, athro Cymdeithas Gerddorol Cantorion y Carneddi. Rhoddodd ' Eos Llechid ' wersi iddo mewn cynghanedd a chyfansoddiant, a daeth yn gynganeddwr da. Yn 16 oed yr oedd wedi cyfansoddi amryw donau ac anthemau ac ennill gwobrwyon mewn eisteddfodau. Cyfansoddodd tua dwsin o anthemau. Cyhoeddodd ei anthem ' Dyn a aned o wraig,' a daeth yn anthem angladdol boblogaidd yn ardaloedd chwareli Gogledd Cymru hyd ddechrau'r 20fed ganrif. Bu farw trwy gael ei daro â darn o graig yn chwarel Caebraichycafn, 29 Awst 1858 a chladdwyd ef ym mynwent Llanllechid.

Awdur

• Robert David Griffith, (1877 - 1958)

Ffynonellau

• 'Trebor Llechid,' Llyfr Hanes Llenyddiaeth ac Enwogion Llanllechid a Llandegai (1921)

Dolenni Ychwanegol

• Wikidata: Q20734321

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/