DAVIES, EVAN THOMAS ('Dyfrig '; 1847 - 1927), clerigwr ac eisteddfodwr

Ganwyd yng Nghwmcefn, plwyf Llanfihangel Ystrad, Sir Aberteifi, 20 Mehefin 1847, mab Thomas Davies a Rachel ei wraig. Addysgwyd ef yn ysgol Ystrad Meurig ac yng Ngholeg Dewi Sant, Llanbedr Pont Steffan (B.A., 1869).

Ar ôl tymor byr fel athro yn Greenock, urddwyd ef yn ddiacon yn 1870 gan yr esgob Ollivant o Landaf, ac yn offeiriad yn 1871. Bu'n gurad yn Llanwynno, Ferndale, a'r Betws cyn cymryd gofal eglwys Dewi Sant yn Lerpwl yn 1875; dychwelodd i Gymru a bu'n ficer Aberdyfi (1882), Pwllheli (1890), a Llanfihangel Ysgeifiog ym Môn (1906-13). Bu'n ddeon gwlad Llŷn o 1891 hyd 1900, ac yn ganon trigiannol yn eglwys gadeiriol Bangor o 1906 ymlaen. Priododd, 1885, Catherine Anne Edwards o Aberdyfi.

Cofir amdano fel pregethwr grymus ac effeithiol, a darlithydd cymeradwy; bu'n aelod o Orsedd y Beirdd dan yr enw ' Dyfrig ', a chyhoeddodd Cydymaith y Cymro (1885), Pregethau, Erthyglau ac Areithiau, 1894 a Pregethau ac Anerchiadau (1899). Bu farw 31 Hydref 1927 ym Mangor, a'i gladdu ym mynwent Glanadda.

Awdur

• Thomas Iorwerth Ellis, (1899 - 1970)

Ffynonellau

• Crockford's Clerical Directory, 1926
• Y Llan, 4 Tachwedd 1927
• Yr Haul, Chwefror-Mawrth 1928

Dolenni Ychwanegol

• Wikidata: Q20733044

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/