DAVIES, WILLIAM (1785 - 1851), gweinidog Wesleaidd a chenhadwr

Ganwyd 12 Hydref 1785 ger Llandyrnog. Ymunodd â'r seiat Wesleaidd wedi clywed Edward Jones, Bathafarn, yn 1800. Yn 1805, cyn bod yn llawn 20 oed, aeth yn weinidog i Fiwmares; o 1806 hyd 1813 gweinidogaethodd yn Sir Drefaldwyn a'r De, gan sefydlu achosion newydd lawer. Aeth i Lundain yn 1814, a chyn diwedd y flwyddyn gadawodd y wlad hon i fynd yn genhadwr (y cyntaf o'r Wesleaid Cymraeg) i Sierra Leone, lle y bu'n henadur, yn faer tref, ac yn ynad. Yn 1818 dychwelodd oddi yno oherwydd afiechyd, a bu'n gweinidogaethu ar gylchdaith Saesneg Penzance (1819-20) ac mewn amryw gylchdeithiau yng Nghymru hyd ei ymneilltuad yn 1841. Bu'n gadeirydd y dalaith Gymraeg (1821-6) ac yn ysgrifennydd talaith y De (1829-33). Cyhoeddodd ysgrifau lawer yn yr Eurgrawn Wesleyaidd ac amryw fân lyfrau, pregethau gan mwyaf, a'i ddyddiadur, pan ydoedd yn genhadwr yn Sierra Leone, heblaw cyfeithiadau o emynau Wesley. Effeithiodd yr afiechyd a gafodd yn Affrica ar ei feddwl, a chaed ef wedi ymgrogi ger ei gartref yng Nghydweli, 9 Chwefror 1851.

Awdur

• Y Parchedig Griffith Thomas Roberts, (1887 - 1977)

Ffynonellau

• Hugh Jones, Hanes Wesleyaeth Gymreig (1911–3), ii, 712-6
• Yr Eurgrawn Wesleyaidd, 1909, 210-5

Dolenni Ychwanegol

• Wikidata: Q20734586

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/