ELLIS, THOMAS (c. 1819 - 1856), dwyreinydd

Ganwyd yn Llanfyllin, Sir Drefaldwyn, tua 1819, a chan nad oes gyfeiriad ato yng nghofrestr y plwyf, y mae'n debyg iddo gael ei fedyddio yng nghapel y Methodistiaid Calfinaidd yno. Mynychai ysgol Morris Davies, ond disgybl gwan ydoedd, ac ymunodd â'i dad fel crydd. Wedi hynny crwydrodd i Lerpwl; yno ymddiddorodd mewn ieithoedd dwyreiniol. O 1848 hyd 1850 dywedir iddo gynorthwyo Samuel Bagster i baratoi ei brif weithiau Hebraeg, gan gynnwys Analytical Hebrew and Chaldee Lexicon. ond gwyddom iddo hefyd grwydro yn y Dwyrain yn yr un cyfnod. O Ragfyr 1850 hyd ei farw yn Rhagfyr 1856 cyflogwyd ef ar uwchrif yn yr Amgueddfa Brydeinig i restru llawysgrifau Syrieg, ond y mae'n amheus a fu ei waith o werth arbennig, oherwydd cawn Wright's Catalogue yn ei anwybyddu ond yn canmol gwaith ei ragflaenydd Cureton yn dra uchel. Ar y llaw arall, cawn Layard, yn y rhagair i Discoveries in the Ruins of Nineveh and Babylon, 1853, yn ei gydnabod am gyfarwyddyd gwerthfawr.

Awdur

• Y Parchedig Athro Bleddyn Jones Roberts, (1906 - 1977)

Ffynonellau

• R. Williams, Montgomeryshire Worthies (1894)
• Robert Williams, Enwogion Cymru. A Biographical Dictionary of Eminent Welshmen (1852), 89
• llythyr gan J. Leveen, Dept. of Oriental Books and MSS., the British Museum, 20 Mai 1949

Dolenni Ychwanegol

• Wikidata: Q20734441

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/