EVANS, DAVID (1842 - 1914), gweinidog gyda'r Annibynwyr

Ganwyd 15 Ionawr 1842 yn Penybontfawr, Sir Drefaldwyn. Bu'n gweithio yn ffatri ei dad ac yr oedd yn un o'r rhai y dylanwadwyd arnynt gan ddiwygiad crefyddol 1859. Dechreuodd bregethu yn Llanfyllin. Aeth i ysgol yn Llundain, lle yr oedd ei frawd Owen Evans (1829 - 1920), yn weinidog, i baratoi ar gyfer coleg. Bu yn athrofa'r Bala, 1860-3. Bu'n weinidog yn Rhosymedre, 1863-9, y Bermo a'r Cytiau, 1870-2, Cymer (Rhondda), 1872-6, Pentre (Rhondda), 1876-82, Heol Awst (Caerfyrddin), 1882-1907. Bu'n golygu Y Dyddiadur Annibynnol am rai blynyddoedd. Cyhoeddodd Cofiant y Gŵr Hynod , Cymeriadau Hynod , a Cymeriadau a Chymanfaoedd. Yr oedd yn ŵr cadarn yn yr Ysgrythyrau, ac yn bregethwr naturiol a hoffai draethu ar hanesion, digwyddiadau, a chymeriadau yr Hen Destament. Bu farw 22 Mawrth 1914.

Brawd arall iddo oedd Thomas Evans (1844 - 1922).

Awdur

• Y Parchedig John Dyfnallt Owen, (1873 - 1956)

Ffynonellau

• Y Tri Hyn sef y Parchedigion Owen Evans, D.D., Llundain, David Evans, Caerfyrddin, Thomas Evans, Amlwch (1931)
• Hanes Eglwys Heol Awst, Caerfyrddin (1926), 78-84

Dolenni Ychwanegol

• Wikidata: Q20732815

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/