EVANS, OWEN (1829 - 1920), gweinidog Annibynnol ac awdur

Ganwyd 19 Tachwedd 1829 yn Penybontfawr, Sir Drefaldwyn. Hanai o deulu crefyddol iawn - yr oedd yn gâr i Ann Griffiths o ochr ei fam. Bu'n dilyn crefft ffatrïwr yn ifanc. Daeth yn aelod crefyddol yn Llanfyllin pan oedd yn 16 oed. Bu yn yr ysgol gyda ' Ieuan Gwynedd ' am ysbaid ac yn cadw ysgol yn yr un man yn ddiweddarach. Dechreuodd bregethu yn Llanfyllin, a bu'n gweinidogaethu yn Berea, Môn, 1853-4; Maentwrog, 1854-6; Fetter Lane, Llundain, 1856-63; Brymbo a Wrecsam, 1863-7; Llanbrynmair, 1867-81; Fetter Lane (eilwaith) gyda King's Cross, 1881-1906. Ymddeolodd o'r weinidogaeth yn 1900 a bu'n preswylio yn Lerpwl, 1901-18, a Llundain, 1918-20. Derbyniodd flwydd-dâl o'r ' Civil List ' yn 1920. Bu'n gadeirydd Undeb yr Annibynwyr yn 1887.

Darlithiodd lawer ar y Beibl a throes rai o'i ddarlithiau yn gyfrolau argraffedig - e.e. Gwyrthiau Crist, 1868; Dammegion yr Arglwydd Iesu, 1873; Oriau gyda'r Iesu, 1882; Merched yr Ysgrythyrau a Sêr y Dwyrain, 1886; Geiriau Olaf Iesu Grist, 1887; Yr Aberthau, 1889; Bywgraffiadau'r Beibl a Phregethau Eraill, 1899. Nid oedd yn bregethwr huawdl fel rhai o'i gyfoeswyr, ac ni ragorai mewn arddull lenyddol yn ei weithiau. Bu farw 1 Mehefin 1920.

Brodyr iddo oedd David Evans (1842 - 1914) a Thomas Evans (1844 - 1922).

Awdur

• Y Parchedig John Dyfnallt Owen, (1873 - 1956)

Ffynonellau

• Y Tri Hyn sef y Parchedigion Owen Evans, D.D., Llundain, David Evans, Caerfyrddin, Thomas Evans, Amlwch (1931)
• Y Dysgedydd, Gorffennaf 1920

Dolenni Ychwanegol

• Wikidata: Q20734057

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/