EVANS, JOHN (1767 - 1827), gweinidog gyda'r Bedyddwyr a phennaeth ysgol ramadeg yn Islington

Ganwyd ym Mrynbuga, 2 Hydref 1767. Hanoedd o Evansiaid y Pentre, Maesyfed. Ei daid, Caleb Evans, oedd trydydd athro Coleg Trosnant. Hanner brawd ei daid oedd Hugh Evans, prifathro Coleg Bryste. Ym Mryste y dechreuodd John bregethu yn 1784. Addysgwyd ef yno ac yn Aberdeen, a graddiodd yn M.A. ym Mhrifysgol Edinburgh yn 1790. Urddwyd ef yn Worship Street, Llundain, yn 1792. Agorodd ysgol i bregethwyr ieuainc ac eraill yn 1796 yn Islington, ac ennill clod. Diffrwythwyd ei gluniau yn 1815, fel na fedrai fyned i'r pulpud na'r ysgol heb gymorth. Rhoes heibio i'r olaf yn 1821, ar farwolaeth ei drydydd mab a olygai i'w ddilyn fel prifathro. Parhaodd i bregethu hyd o fewn ychydig wythnosau i'w farwolaeth ar 26 Ionawr 1827. Ystyrid ef yn bregethwr huawdl, yn siaradwr byrfyfyr nodedig, ac apeliai ei arddull seml ac urddasol at bob dosbarth. Ymddiddorai mewn llenydda. Daeth oddeutu 40 o weithiau o'i ddwylo; y pennaf yw An Address to Young People on the Necessity and Importance of Religion; A Sketch of the Denominations of the Christian World, 1795; Memoirs of the Life and Writings of William Richards, LL.D., 1819. Hefyd golygodd Cambro-British Biography, 1820, a The Welsh Nonconformist Memorial.

Awdur

• Y Parchedig William Joseph Rhys, (1880 - 1967)

Ffynonellau

• Oxford Dictionary of National Biography
• Edward Jones, Rhestr gyda nodiadau byrion, o Enwogion Cymreig o 1700 i 1900 (1908)
• a'r cyfeiriadau ynddynt

Dolenni Ychwanegol

• VIAF: 54138331
• Wikidata: Q6231979

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/