EVANS, MAURICE (1765 - 1831), clerigwr efengylaidd

Ganwyd yn Pengelli, plwyf Llangwyryfon, Sir Aberteifi. Addysgwyd ef yn Ystrad Meurig dan Edward Richard, urddwyd ef gan esgob Tyddewi, 1787, daeth yn gurad i Henry Venn yn Yelling, sir Huntingdon, 1791-6, ac yna yn Eltisley, sir Caergrawnt, 1796-1810. Penodwyd ef i ficeriaeth Tregaron, 20 Medi 1810; Penybryn, 18 Ebrill 1818; Llangeler, 14 Chwefror 1820; a Penybryn ynghyda Betws Ifan a Brongwyn, 30 Hydref 1820. Bu farw 24 Rhagfyr 1831. Mawrygid ei sêl efengylaidd gan brif arweinwyr y mudiad yn Lloegr yn nyddiau Henry Venn; meddai Thomas Jones, Creaton, amdano mewn llythyr at Thomas Charles, Mawrth 1794 : 'He is a charming soul, a bundle of sweet dispositions.' Bu ganddo ran helaeth yn hyrwyddo'r ffordd i gael Beiblau i Gymru, cyn sefydlu Cymdeithas y Beiblau.

Awdur

• Y Parchedig Daniel Williams, (1878 - 1968)

Ffynonellau

• John Owen, Memoir of the Rev. Thomas Jones late of Creaton, Northamptonshire (1851)
• Josiah Bateman, The life of the Rev. Henry Venn Elliott, M.A., perpetual curate of St. Mary's Brighton, and late Fellow of Trinity College, Cambridge (1868) (5ed arg.), 57, 500, 520
• D. E. Jenkins, Life of Thomas Charles (Dinbych 1908), ii, 248-65

Dolenni Ychwanegol

• Wikidata: Q20733901

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/