FRANCIS, JOHN DEFFETT (1815 - 1901), peintiwr a chasglwr celfyddwaith

Mab John Francis, saer cerbydau yn Abertawe, a'i wraig Mary, a brawd George Grant Francis, yr hynafiaethwr. Bedyddiwyd ef yn eglwys Fair, Abertawe, 2 Mehefin 1815.

Dangosodd ei allu fel arlunydd yn ieuanc, ac yn enwedig ei ddawn i bortreadu pobl. Wedi gweithio yng Nghymru am beth amser, symudodd i Lundain, a daeth i gysylltiad agos â Dickens, Thackeray, Ruskin, a llenorion enwog eraill, ac ef oedd un o sylfaenwyr clwb adnabyddus, ' The Savage Club,' canolfan i'r sawl a ymddiddora mewn llenyddiaeth a chelfyddyd. Gwnaeth ddarluniau o'r frenhines Buddug, Syr Robert Peel, ac enwogion eraill, ac ysgythrwyd amryw ohonynt. Dangoswyd un darlun o'i waith yn arddangosfa'r Academi Frenhinol yn 1846, a dangoswyd amryw o'i weithiau mewn gwahanol arddangosfeydd rhwng 1837 a 1860.

Saif ' Oriel Deffett Francis ' yn Abertawe heddiw fel tystiolaeth o'i ddiwydrwydd fel casglwr celfyddwaith. Cedwir yno'r casgliad niferus o ddarluniau ac ysgythriadau o bob math a gyflwynwyd yn rhodd ganddo i gorfforaeth Abertawe, ynghyd â'i gasgliad gwerthfawr o lyfrau ar gelfyddyd. Cyflwynodd Francis rodd debyg hefyd i'r Amgueddfa Brydeinig. Bu farw yn Abertawe 21 Chwefror 1901.

Awdur

• Megan Ellis, (1906 - 2001)

Ffynonellau

• T. M. Rees, Welsh painters, engravers and sculptors, 1527–1911 (1912)
• Graves, A Dictionary of Artists (1893; 1901)
• Allgemeines Lexicon der Bildenden Künstler

Darllen Pellach

• Catalogue of the "Deffett Francis" collection in the Reference Department of the Swansea Public Library (Swansea 1887)
• Erthygl Wicipedia: John Deffett Francis

Dolenni Ychwanegol

• Archifau LlGC: NLW MS 2868E: A satirical poem entitled Will of J[ohn] D[effett] Francis, Esq. [1815-1901], 30 June 1876
• VIAF: 64280302
• Wikidata: Q19842165

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/