Fe wnaethoch chi chwilio am Sir William Williams, 1st Baronet, of Gray
Dywedir iddo gael ei eni yn Abergwaun, ond nid oes sicrwydd pa bryd am nad yw rhestri bedyddiadau'r plwyf yn gyflawn am y cyfnod hwnnw. Awgryma H. M. Vaughan mai'r un yw'r peintiwr a'r Thomas, mab Thomas George, saer maen, a'i wraig Ann, a fedyddiwyd yn Abergwaun 28 Mai 1810. Eithr awgryma Basil Long iddo gael ei eni yn 1790, a feallai mai ef sydd yn agosaf i'w le oherwydd cawn fod George yn arddangos un o'i ddarluniau yn y Royal Academy yn 1829. Dangoswyd pump o'i ddarluniau yn yr Academy honno rhwng 1829 a 1838.
Dywedir ei fod yn byw yn Hwlffordd yn 1824; y mae'n sicr iddo weithio yn Sir Benfro am beth amser, a gwnaeth fân-ddarluniau o aelodau o deulu Harries o Dregwynt. Deallwn ei fod yn Llundain yn gweithio yn 1826 yn ôl mân-ddarlun yng nghasgliad Amgueddfa 'Victoria and Albert' yn dwyn y nodyn canlynol ar y cefn: 'Painted by T. George. London Octr 1826.'
Y mae gan Syr Thomas Barry Jones fân-ddarlun gan George, darlun o'r peintiwr ei hun yn ôl pob tebyg, a roddwyd ganddo, ychydig cyn ei farw, i'w frawd Henry yn Abergwaun. Ceir yn yr Amgueddfa Genedlaethol yng Nghaerdydd un mân-ddarlun ar ifori gan George a thri darlun dyfrlliw ganddo, ac y mae yn yr Amgueddfa Brydeinig ddau ddarlun maenargraff seiliedig ar ddarluniau gan George.
Er ceisio adfer ei iechyd aeth Thomas George i ynys Madeira, ond bu farw yno yn 1840.
Dyddiad cyhoeddi: 1953
Hawlfraint Erthygl: http://rightsstatements.org/page/InC/1.0/
Mae'r Bywgraffiadur Cymreig yn cael ei ddarparu gan Lyfrgell Genedlaethol Cymru a Chanolfan Uwchefrydiau Cymreig a Cheltaidd Prifysgol Cymru. Mae ar gael am ddim ac nid yw'n derbyn cymorth grant. Byddai cyfraniad ariannol yn ein helpu i gynnal a gwella'r wefan er mwyn i ni fedru parhau i gydnabod Cymry sydd wedi gwneud cyfraniad nodedig i fywyd yng Nghymru a thu hwnt.
Ewch i'n tudalen codi arian am ragor o wybodaeth.