GRIFFITHS, GRIFFITH (1799 - 1845), cenhadwr dan nawdd Eglwys Loegr

bedyddiwyd ef 24 Rhagfyr 1799, yn fab i Griffith ac Elizabeth Griffiths, Ty'n-nant, Llanfihangel-geneu'r-glyn, Sir Aberteifi. Cafodd addysg o dan yr archddiacon John Williams yn ysgol ramadeg Llanbedr-pont-Steffan. Ar ôl cael ei ordeinio yn ddiacon hwyliodd i Jamaica yn 1825 i fod yn genhadwr o dan gymdeithas Eglwys Loegr er hyrwyddo lledaeniad yr efengyl mewn gwledydd tramor; cafodd ei ordeinio'n offeiriad yn Jamaica gan yr esgob Lipscombe, a'i ddewis i weithio yn rhanbarth Marchioneal Bay; fe'i symudwyd i Portland yn 1833 ac, yn ddiweddarach, i Trelawney. Gweinidogaethodd yn llwyddiannus ymysg y boblogaeth Ddu mewn cyfnod terfysglyd, pan oedd y rhai a gaethiwyd yn cael eu rhyddhau. Bu farw 8 Rhagfyr 1845.

Awduron

• Y Parchedig Ddr Evan Lewis Evans, (1898 - 1978)
• Diwygiwyd gan y tîm golygyddol, 2024

Ffynonellau

• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• Geirlyfr Bywgraffiadol o Enwogion Cymru (1870)

Dolenni Ychwanegol

• Wikidata: Q20733090

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/