GRIFFITHS, JAMES (1782 - 1858), gweinidog gyda'r Annibynwyr

Ganwyd 2 Awst 1782 yn Clungwyn, Meidrim, Sir Gaerfyrddin, mab David a Margaret Griffiths, aelodau yng nghapel Bethlehem, S. Clêr. O ysgol yn S. Clêr aeth i ysgol ramadeg Caerfyrddin, ac oddi yno i'r Coleg Presbyteraidd yn 1802. Ordeiniwyd ef ym Machynlleth ym mis Mawrth 1807. Cynhyddodd aelodaeth ei eglwysi; yr oedd Aberhosan a Penuel o dan ei ofal ac yr oedd yn arolygu eglwysi Towyn, Llanegryn, a Llwyngwril. Priododd Sarah Phillips yn 1811. Yn 1841 symudodd i Rhodiad a Tyddewi, lle y llafuriodd hyd ei farw ar 11 Ebrill 1858; claddwyd ef yn Ebenezer, Tyddewi. Cyhoeddodd Trefn Eglwys dan y Testament Newydd, 1811. Gyda John Roberts, Llanbrynmair, ac eraill, yr oedd yn gyfrifol am y 'System Newydd.' Cyfrifid ei syniadau yn anuniongred, a bu raid i Griffiths ddioddef o'u plegid; mynnai gweinidogion uniongred ei esgymuno.

Awdur

• Y Parchedig Ebenezer Curig Davies, (1895 - 1981)

Ffynonellau

• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 403
• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909)
• T. Morgan, Enwogion Cymreig 1700-1900 (1907)
• Cyfrol Goffa Gweinidogion Annibynnol Penfro, 9

Dolenni Ychwanegol

• VIAF: 180145542
• Wikidata: Q20733316

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/