HUGHES, WILLIAM (bu farw 1600), esgob Llanelwy

Ganwyd yn Sir Gaernarfon, mab Hugh ap Cynwrig. Aeth i Goleg Queens', Caergrawnt, Tachwedd 1554, a graddio yn B.A. yn 1557 a dyfod yn M.A. yn 1560 ac yn D.D. yn 1569. Daeth yn gymrawd Coleg Crist yn 1557, ac, yn 1565, yn ' Lady Margaret Preacher.'

Bu'n gaplan i ddug Norfolk, ac achosodd ddadlau mawr trwy bregeth a draddododd yn Leicester yn 1567. Daeth yn rheithor Llysfaen, Sir Gaernarfon, ac yn rheithor Dennington cyn cael ei gysegru yn esgob Llanelwy ar 13 Rhagfyr 1573. O dan drwydded archesgobol daliai 'in commendam' fywiolaethau a oedd yn werth £150 y flwyddyn; yr oedd ganddo 16 ar wahanol adegau, ond nid i gyd gyda'i gilydd. Serch dywedyd iddo, fel esgob, fod yn euog o esgeulustod dybryd, o godi arian ar gam, ac o roddi bywiolaethau, etc., i gyfeillion a pherthnasau, rhaid cofio, er ei glod, iddo roddi cymorth i'r esgob Morgan, cyfieithydd y Beibl i'r iaith Gymraeg, iddo noddi beirdd, ac iddo hefyd, yn 1585, wrthod sefydlu rheithor am na fedrai ddigon o Gymraeg. Bu farw 18 Tachwedd 1600, gan adael cyfoeth lawer i'w ferch, gwraig aer teulu Mostyn.

Awdur

• Syr Glanmor Williams

Ffynonellau

• Oxford Dictionary of National Biography; Athenae Cantabrigienses (1858–1913), ii, 289-90
• H. B. Thomas, A History of the Diocese of St. Asaph (1874), i, 96-100; ii, 225-6
• F. O. White, Lives of the Elizabethan bishops of the Anglican Church (Llundain 1898)
• R. Flenley, A calendar of the register of the Queen's Majesty's Council in the dominion and principality of Wales and the marches of the same (1535) 1569-1591 (London 1916)
• Ifan ab Owen Edwards, A Catalogue of Star Chamber Proceedings Relating to Wales (Cardiff 1929), 54, 56, 58, 94

Dolenni Ychwanegol

• Wikidata: Q15990059

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/