HUMPHREYS-OWEN, ARTHUR CHARLES (1836 - 1905), Aelod seneddol

Ganwyd yn Garthmyl (Maldwyn), 9 Tachwedd 1836, yn fab i Erskine Humphreys, bargyfreithiwr; o du ei fam, yr oedd yn nai i A. J. Johnes. Yn 1876, etifeddodd diroedd Oweniaid Glansevern (Cefnhafodau gynt - gweler dan Owen o Gefnhafodau), a chymerodd yr enw 'Humphreys-Owen.' Aeth i ysgol Harrow ac i Goleg y Drindod yng Nghaergrawnt (lle y graddiodd yn 1860); derbyniwyd ef yn fargyfreithiwr yn 1863. Ymdaflodd i fywyd cyhoeddus Maldwyn (a Chymru), yn enwedig i fuddiannau addysg ganolraddol ac uwchraddol. Bu'n aelod seneddol dros y sir o 1894 hyd 1905, yn gadeirydd y Bwrdd Canol o 1896 hyd 1905, yn flaenllaw gyda Choleg y Brifysgol yn Aberystwyth, ac yn hyrwyddwr selog i Brifysgol Cymru. Yn wleidyddol, yr oedd yn Rhyddfrydwr cadarn. Bu farw 9 Rhagfyr 1905.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• F. E. Hamer, yn Vyrnwy Morgan (gol.), Welsh Political and Educational Leaders in the Victorian Era (1908)
• Venn, Alumni Cantabrigienses

Darllen Pellach

• T. Marchant Williams, Welsh Members of Parliament, 1894 (Cardiff 1894)
• Biographical sketch: A. C. Humphreys-Owen Esq M.P. for Montgomeryshire (Oswestry 1894)
• Erthygl Wicipedia: Arthur Humphreys-Owen

Delweddau

• Stanislas O. Walery, Arthur Charles Humphreys Owen
• LlGC: Mr. A. C. Humphreys-Owen, A.S

Dolenni Ychwanegol

• Wikidata: Q4799154

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/