HUMPHREYS, ROBERT (1779 - 1832), gweinidog Wesleaidd

Ganwyd yn Llanelidan. Argyhoeddwyd ef dan weinidogaeth Edward Jones, Bathafarn (1801). Dechreuodd bregethu yn 1804, yn Llangynog, lle'r aethai i weithio er mwyn bod o gymorth i'r achosion yno a Llanrhaeadr Mochnant a Llanfyllin. Derbyniwyd ef i'r weinidogaeth yn 1805. Priododd nith Sgwïer Vaughan, Penmaen Dyfi, â'i hachubasai rhag camdriniaeth pan oedd ar daith bregethu.

Llafuriodd yn Nolgellau (1806), Manceinion (1807), Dinbych (1808). Cadwai ysgol pan oedd yng Nghaernarfon (1811-2), Dolgellau (1812). Unwyd cylchdeithiau Dolgellau a Machynlleth (1816), ac yntau'n arolygwr, Caernarfon (1816), Dinbych a Llanrwst (1819), Llandeilo (1820). Unwyd cylchdeithiau Aberhonddu a Llandeilo (1821), ac yntau'n arolygwr; Caerfyrddin (1822), Merthyr Tydfil (1825), Caerdydd (1827), Llanidloes (1830), Biwmares (1832). Cerddodd yno. Anogwyd ef ym Mangor i beidio â mynd i Fiwmares am fod y colera yno. Yno yr aeth, gan yrru ei deulu i'r wlad. Pregethodd y Sul a nos Lun, a chynnal cyfarfod gweddi am bump fore Mawrth, a bu farw nos Fawrth (31 Awst 1832) o'r colera.

Wele enghraifft gyffredin o'i lafur (dyddlyfr, Hydref 1823): ' Pregethu 468 gwaith, teithio 3,224 milltir mewn blwyddyn.' Dychwelwyd cannoedd dan ei weinidogaeth.

Cyhoeddodd gofiannau, ysgrifau diwinyddol, pregethau, emynau, ac englynion yn Yr Eurgrawn; Casgliad o Emynau i'r Ysgol Sabbothol; a llyfr o farddoniaeth - Y Wenynen.

Awdur

• Y Parchedig Edward Tegla Davies, (1880 - 1967)

Ffynonellau

• Yr Eurgrawn Wesleyaidd, 1907
• E. Rees, Robert Humphreys an early Methodist preacher in Wales (Llundain 1913), translated from the Welsh by Howel Thomas, 1913
• Teithiau a Barddoniaeth Robyn Ddu Eryri, 12

Dolenni Ychwanegol

• VIAF: 29065243
• Wikidata: Q20734337

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/