HUWS, MORIEN MON (Morien Môn '; 1856 - 1932), bardd a llenor

Ganwyd yn Amlwch, sir Fôn, 10 Awst 1856, a bu yn ysgol Rhos-y-bol yn y sir honno pan oedd Syr John Rhys yn brifathro. Llwyddodd yn gynnar yn ei oes i ennill gwobrwyon mewn eisteddfodau, a dechreuodd bregethu pan oedd yn 17 oed. Ymfudodd i U.D.A. yn 1880 a daeth yn aelod o'r gymanfa Annibynnol yn Oneida County, New York, ac yn weinidog ar eglwys Peniel, Remsen, N.Y. Yn 1899 ymunodd â'r Methodistiaid Calfinaidd yng nghymanfa New York; yn 1911, fodd bynnag, dychwelodd at yr Annibynwyr a bu'n weinidog yn Pittston, Pa. Ysgrifennodd lawer i'r cylchgronau Cymreig Americanaidd ac i'r Drych. Bu farw 27 Tachwedd 1932 yn Stittsville, N.Y., a chladdwyd ef ym mynwent Fairfield gerllaw Remsen, N.Y.

Awdur

• Robert (Bob) Owen, (1885 - 1962)

Ffynonellau

• David Jones, Memorial volume of Welsh Congregationalists in Pennsylvania, U.S.A., their churches, periodical convocations, clergy and prominent lay members (Utica 1934), 246
• D. J. Williams, One Hundred Years of Welsh Calvinistic Methodism in America (Philadelphia 1937), 422

Dolenni Ychwanegol

• Wikidata: Q20733955

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/