JAMES, ANGHARAD (fl. 1680?-1730?), prydyddes

Roedd yn byw yn y Parlwr, Penanmaen, Dolwyddelan. Rhoddir peth o'i hanes gan Owen Thomas yn Cofiant John Jones, Talsarn, pen. 1. Yno dywedir mai merch oedd hi i James Davies ac Angharad Humphreys, Gelli Ffrydau, Llandwrog, Sir Gaernarfon, ei bod hi'n 20 oed pan briodwyd hi â William Prichard, a oedd yn 60 mlwydd oed ar y pryd, iddi gael addysg dda a dyfod yn hyddysg yn yr iaith Ladin, ei bod yn fedrus gyda'r delyn, ac yn prydyddu.

Yr oedd John Jones, Talsarn, yn or-ŵyr iddi hi a'i gŵr trwy eu merch ieuengaf, Catherine, ac yn or-or-ŵyr trwy eu merch hynaf, sef Gwen.

Cadwyd peth o'i gwaith mewn llawysgrifau. Dyma esiamplau: cerdd yn dechrau ' Och alar o choeliwch och golli diddanwch ' (' Angharad James a'i canodd rhyngthi ai gwr William Prichard y fl. 1718 '); un arall, ' Ymddiddan rhwng dwy chwaer, un yn dewis gwr oedrannus a'r llall yn dewis ieuenctid ' (' Angharad James a'i canodd o'r ymddiddan a fu rhyngthi a'i chwaer Margared James '); dau bennill - ' Pan oeddid yn bygwth Wm. Prichard o Ben-An-maen o Ddôl Gwyddelan a chyfraith, ebre ei wraig yn y flwyddyn 1717. '

Awdur

• Syr William Llewelyn Davies, (1887 - 1952)

Ffynonellau

• Archifau LlGC: NLW MS 9B: David Jones (Dewi Fardd): Caneuon a baledi
• Archifau LlGC: NLW MS 436B: Barddoniaeth
• Archifau LlGC: J. Glyn Davies Papers: The Henblas Manuscripts 25: A Poem by Robert Humffrey y prydydd bach in the autograph of Angharad James
• Archifau LlGC: J. Glyn Davies Papers: Tanycastell Collection 13: Part of a 'Cywydd Marwnad' in the autograph of Angharad James

Darllen Pellach

• Women's Poetry: Angharad James (1677–1749) (cyrchwyd Awst 2020)
• Erthygl Wicipedia: Angharad James

Dolenni Ychwanegol

• Wikidata: Q4763159

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/