JAMES, WILLIAM (1833 - 1905), gweinidog gyda'r Methodistiaid Calfinaidd

Ganwyd 15 Mawrth 1833, yn fab i Thomas ac Anne James, Tynrhos, Llanfihangel-genau'r-glyn. Bu hyd 15 oed yn ysgol ramadeg y pentre (lle y cafodd Lewis Edwards yntau ei ysgol); yna bu'n fugail ar dir ei dad. Bwriadai ei dad iddo fod yn lledrwr yn Aberaeron, ond mynnai crefyddwyr capel y Garn iddo fynd yn bregethwr, gan ei fod mor weithgar yn yr ysgol Sul a chyda chaniadaeth y capel. Felly anfonwyd ef (1853) i ysgol yng Nghaerlleon Fawr, ac oddi yno (1855) i Goleg y Bala; yn 1859, ymaelododd ym Mhrifysgol Llundain, ac yn 1862 graddiodd ynddi. Bu'n bugeilio eglwys y Garn am rai misoedd, ac eglwysi Aberdyfi a'r Tywyn o Hydref 1863 hyd Ionawr 1866; yna aeth i Moss Side, Manceinion, lle y treuliodd weddill ei oes. Bu farw 19 Hydref 1905. Yr oedd wedi tyfu'n ŵr blaenllaw iawn yn ei gyfundeb; bu'n llywydd cymdeithasfa'r Gogledd yn 1888 ac yn llywydd y gymanfa gyffredinol yn 1892. Pregethwr sylweddol, a thrwm yn wir, oedd ef; ond yn ei ysgrifau yn Y Traethodydd a'r Geninen a chyfnodolion ei enwad yr oedd ar brydiau fwy o ysgafnder. Heblaw llawlyfr ar yr epistolau bugeiliol, cyhoeddodd, 1898, Yr Eglwys, ei Sacramentau a'i Gweinidogaeth - ei ' Ddarlith Davies ' yn 1897. Bu'n briod ddwywaith.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Cofiant a rhai o bregethau y Parchedig William James, B.A., D.D., Manchester (Caernarfon 1910) (d.d.)

Dolenni Ychwanegol

• VIAF: 101470591
• Wikidata: Q20734645

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/