JENKINS, ISAAC (1812 - 1877), gweinidog Wesleaidd

Ganwyd 25 Chwefror 1812, yng Nghwm Rheidol, Sir Aberteifi, mab Edward Jenkins, Ystumtuen. Addysgwyd ef mewn ysgolion lleol; bu'n ysgolfeistr mewn amryw fannau yng Ngheredigion a Maldwyn; ac wedi ei dderbyn i'r weinidogaeth cafodd addysg bellach yn Sefydliad Diwinyddol Hoxton (1834-6). Gweinidogaethodd ar gylchdeithiau Abertawy (1836), Caerdydd (1838), Llanidloes (1839), Aberhonddu (1842), Merthyr (1843), Caerfyrddin (1845), Tyddewi (1848), Aberhonddu (1851), Pen-y-cae (1854), Caerdydd (1856), Aberdâr (1859), y Bont-faen (1862), Abertawy (1865), Merthyr (1868), Caerdydd (1871). Bu'n ysgrifennydd talaith Gymraeg Deau Cymru (1843-66) a'i chadeirydd (1866-74). Priododd Elizabeth, merch y Parch. Hugh Hughes (1778 - 1855). Ymneilltuodd yn 1874 a bu farw ym Merthyr, 25 Awst 1877. Golygodd Trysor i Blentyn, 1839-41, Yr Eurgrawn Wesleyaidd, 1839-41, a thrachefn gyda'r Dr. Thomas Jones, 1857-9; yr oedd yn un o gychwynwyr Y Winllan, 1848; yn awdur ysgrifau lawer i'r Eurgrawn, ac amryw lyfrau, esboniadol yn bennaf, a golygodd Bywyd a Gweinidogaeth Hugh Hughes, 1856. Ef hefyd oedd un o olygyddion Casgliad o Hymnau, 1845.

Awdur

• Y Parchedig Griffith Thomas Roberts, (1887 - 1977)

Ffynonellau

• Yr Eurgrawn Wesleyaidd, 1888, 49-54 et passim; 1909, 401-6

Dolenni Ychwanegol

• Wikidata: Q20733291

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/