JOHNS, DAVID (1796 - 1843), cenhadwr ym Madagascar am yn agos i 17 mlynedd dros Gymdeithas Genhadol Llundain

Mab John Jones, Llain, Llanina, Sir Aberteifi. Yr oedd yn aelod yn eglwys yr Annibynwyr yn Penrhiwgaled. Bu dan addysg yn academi Neuaddlwyd, yn seminari'r Drenewydd, ac yn Gosport, ac ordeiniwyd ef i'r maes cenhadol ar 16 Chwefror 1826. Priododd Mary, ferch William Thomas, 1749 - 1809, gweinidog yr Annibynwyr yn y Bala. Aeth â gwasg argraffu a pheiriant nyddu gydag ef i Madagascar, a bu'n cydweithio â David Griffiths a David Jones i sefydlu dros 25 o ysgolion ag ynddynt dros 2,000 o ddisgyblion. Gan weithio yn ddibaid yn erbyn erlid chwerw bu'n helpu gyda chyfieithu'r Beibl; cyfieithodd Taith y Pererin i iaith y Malagasi, paratôdd eiriadur Malagasi-Saesneg, a golygodd nifer o lyfrau; gyda Freeman ysgrifennodd A Narrative of the Persecutions of the Christians in Madagascar, gwaith y cyhoeddwyd ei gnewyllyn yn Gymraeg hefyd.

Dioddefodd galedi enbyd pan oeddid yn difodi Cristnogaeth yn yr ynys. Wedi iddo orfod gadael yr ynys bu'n cynorthwyo'r Cristnogion a erlidid ac yn cadw mewn cysylltiad â hwynt. Wedi iddo gael cyfnod byr o egwyl yn 1839 dychwelodd i'r ynys, lle y bu farw 6 Awst 1843.

Awdur

• Y Parchedig Ddr Evan Lewis Evans, (1898 - 1978)

Ffynonellau

• A Register of Missionaries, Deputations etc., from 1796 to 1885 (1886), 1923
• E. Lewis Evans, Cymru a'r Gymdeithas Genhadol, sef hanes ei Chychwyn (1945)
• G. Penar Griffith, Cenhadon Cymreig

Darllen Pellach

• John Austin Jenkins, Hanes cenhadon cyntaf Madagasgar (Llundain 1894)

Dolenni Ychwanegol

• VIAF: 49302317
• Wikidata: Q18670980

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/