JONES, DAVID (1797 - 1841), cenhadwr

Cenhadwr ym Madagascar am yn agos i chwarter canrif o dan nawdd Cymdeithas Genhadol Llundain; ganwyd yn Penrhiw, gerllaw Neuadd-lwyd, Sir Aberteifi. Yn 14 oed aeth i athrofa Dr. Thomas Phillips yn Neuadd-lwyd, a phan oedd yn 16 oed dechreuodd deimlo y carai bregethu. Bu wedyn o dan addysg yn Llanfyllin a Gosport. Fe'i cynigiodd ei hun i wasanaeth Cymdeithas Genhadol Llundain, ordeiniwyd ef yn Neuadd-lwyd, 20 a 21 Awst 1817, ac fe'i dewiswyd i fyned i Affrica. Priododd Louisa Darby, Gosport. Cafodd ei anfon i Madagascar yn lle Stephen Laidler; glaniodd yn 1818, a bu'n wael iawn o dan dwymyn; claddodd ei wraig, a'i blentyn yn Tamatave. Ymsefydlodd yn Antananarivo yn 1820. Gyda David Griffiths, cyfieithodd y Beibl yn iaith y Malagasy, a chyda chynhorthwy David Johns, cyhoeddodd lyfr sillebu, catecism, ac emyniadur. Gorfu iddo ymadael, eithr parhaodd i ddefnyddio Mauritius fel gorsaf i efengyleiddio ohoni; bu farw yno ym mis Medi 1841.

Awdur

• Y Parchedig Ddr Evan Lewis Evans, (1898 - 1978)

Ffynonellau

• A Register of Missionaries, Deputations etc., from 1796 to 1885 (1886), 1923
• Griffith Jones (Glan Menai), Enwogion Sir Aberteifi (1868)
• E. Lewis Evans, Cymru a'r Gymdeithas Genhadol, sef hanes ei Chychwyn (1945)

Darllen Pellach

• William Evans, Anerchiadau a phregethau a draddodwyd Ebrill 6ed, 1896, yn nghyfarfodydd dathliad trydded jiwbili cychwyniad yr achos, a chanmlwyddiant sefydliad y diweddar Ddr. Phillips fel gweinidog yn Neuaddlwyd (Llandyssul 1896)
• John Austin Jenkins, Hanes cenhadon cyntaf Madagasgar (Llundain 1894)

Delweddau

• H. Cook, J. Andrews, Revd. David Jones, Missionary (Madagascar)

Dolenni Ychwanegol

• VIAF: 66256393
• Wikidata: Q3018170

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/