JONES, DANIEL (1811 - 1861), cenhadwr gyda'r Mormoniaid

Ganwyd 4 Awst 1811, mab Thomas a Ruth Jones, Tan-yr-ogof, Abergele, Yr oedd ei frawd hynaf, John (1801 - 1856), yn adnabyddus iawn fel dadleuwr yn erbyn y Bedyddwyr - gweler Cymru (O.M.E.), xl, 287. Wedi iddo ymfudo i America troes Daniel Jones yn Formon wrth ei fod yn cludo credinwyr y grefydd honno mewn bad yr oedd ei ofal arno. Yr oedd gyda Joseph Smith noson y 26 Mehefin 1844 pryd y llofruddiwyd y proffwyd hwnnw. Y flwyddyn ddilynol daeth Jones i Gymru yn genhadwr. Gwnaeth Ferthyr Tydfil yn ganolfan a chyhoeddi yno gyfnodolyn misol, Prophwyd y Jubili . Hwyliodd o Lerpwl, 26 Chwefror, 1849, gyda 249 o ddychweledigion Cymreig, a bu'n gofalu amdanynt ar y daith ar draws y gwastadeddau meithion i Salt Lake City - y fintai yn teithio mewn 25 o wagenni â math o do iddynt. Ym mis Awst 1852 dychwelodd ar ail daith genhadol, ac yn 1856 aeth â 703 o seintiau Cymreig i Salt Lake City. Treuliodd weddill ei oes yn bennaeth bad ar y Great Salt Lake. Bu farw 3 Ionawr 1861, gan adael tair gwraig a chwech o blant.

Awdur

• Yr Athro Emeritus David Williams, (1900 - 1978)

Ffynonellau

• Latter Day Saints Biographical Encyclopedia. A Compilation of Biographical Sketches of Prominent Men and Women in the Church of Jesus Christ of Latter-Day Saints (Salt Lake City 1901-36)
• Wendell J. Ashton, Theirs is the Kingdom (Salt Lake City 1945)
• David Williams, 'The Welsh Mormons,' yn The Welsh Review, 1948

Darllen Pellach

• Wil Aaron, Welsh Saints on the Mormon Trail (Talybont 2019)
• Erthygl Wicipedia: Daniel Jones

Dolenni Ychwanegol

• VIAF: 48778488
• Wikidata: Q20732776

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/