JONES, DANIEL (1813 - 1846), cenhadwr ar ran y Methodistiaid Calfinaidd ar Fryniau Khassia, India

mab Edward Jones, Maesyplwm, Llanrhaeadr, sir Ddinbych. Pan nad oedd ond 15 oed gwnaeth adduned yn eglwys fechan Llynypandy, gerllaw yr Wyddgrug, i'w roddi ei hun i wasanaeth yr efengyl, a chan ei fod mor dduwiolfrydig edrychid arno fel un cymwys i'r weinidogaeth ac, yn ddiweddarach, i wasanaethu ar faes y genhadaeth. Aeth i Goleg y Bala yn 1842 a mynd oddi yno, yn 1844, i Lundain am gwrs pellach i'w gymhwyso i fod yn genhadwr. Wedi ei ordeinio bu'n gwasanaethu eglwysi o Rossett, gerllaw Wrecsam. Hwyliodd ef a'i wraig, Ann Evans, i'r India yn 1845, a chyrraedd Bryniau Khassia y flwyddyn ganlynol. Wedi iddo fod am beth amser yn archwilio'r mannau pellennig dychwelodd i orsaf y maes yn Cherappoonjee i ymofyn adnoddau, eithr bu farw yno o dwymyn y 'jungle' a'i gladdu, efe a'i ferch fechan, gyda'i gilydd, yng nghladdfa'r genhadaeth ar 3 Rhagfyr 1846. [Ganwyd 12 Medi 1813 - Not. W. ]

Awdur

• Y Parchedig Ddr Evan Lewis Evans, (1898 - 1978)

Ffynonellau

• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 130
• Newyddion Da sef cylchgrawn y Methodistiaid Calfinaidd, 1892, 46

Dolenni Ychwanegol

• Wikidata: Q20732777

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/