JONES, DAVID (1793 - 1825), gweinidog yng nghyfundeb yr iarlles Huntingdon, ieithydd medrus, ac un o awduron Principia Hebraica, 1817

Ganwyd yng Nghwm Creigiau Fach, Sir Gaerfyrddin, 11 Chwefror 1793, yn fab i'r Parch. Thomas Jones, Caerfyrddin. Cafodd addysg dda, yn breifat i ddechrau, ac yna yn ysgol David Peter yng Nghaerfyrddin, yn y Coleg Presbyteraidd yn yr un dref, ac yng Ngholeg Cheshunt, Swydd Hertford. Astudiodd Arabeg, Syrieg, a Pherseg yn ogystal â Hebraeg a'r ieithoedd clasurol. Ordeiniwyd ef yn 1814, ac yn 1821, ar ôl bod yn Henffordd am gyfnod, aeth yn weinidog i Abertawe fel olynydd i'r Parch. W. Kemp. Torrodd ei iechyd i lawr, a gorfu iddo dreulio gaeaf 1823-4 yn neheudir Ffrainc; ar ei ffordd adref ymwelodd â Llydaw. Dychwelodd i Lydaw ddiwedd 1824 ar anogaeth y Feibl Gymdeithas, dechreuodd ddysgu Llydaweg ei hunan, a gwnaeth lawer i gael cyfieithiad o'r Testament Newydd i'r iaith honno. Bu farw yn Cheshunt 1 Medi 1825, ychydig wythnosau ar ôl cael ei benodi'n athro clasuron yno.

Awdur

• Rhiannon Francis Roberts, (1923 - 1990)

Ffynonellau

• The Evangelical Register, or magazine for the Connexion of the late Countess of Huntingdon (Llundain 1825-43), 1825, 150, 242; 1826, 65
• Lleuad yr Oes sef, amgeueddfa fisol o wybodaeth mewn crefydd, moes, athroniaeth a hanes (Abertawe 1827-1830), Mai 1827
• The Gentleman's Magazine, 1825, ii, 285
• Seren Gomer, 1824, 438; 1825, 93
• The life and times of Selina, countess of Huntingdon (Llundain 1839), 1844, ii, 116, 530
• Geirlyfr Bywgraffiadol o Enwogion Cymru (1870), 572-3
• Bye-Gones, relating to Wales and the Border Counties, 1882-3, 164
• Y Brython (Tremadog) (ail arg.), 411
• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909), 29
• nodiadau gan Dr. T. Witton Davies yn Ll.G.C.
• Dr. L. Dujardin, La vie et les Oeuvres de Jean-François-Marie-Maurice-Agathe Le Gonidec grammairien et lexicographe breton, 1775-1838 (Brest 1949), (Brest, 1949)
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 17

Dolenni Ychwanegol

• Wikidata: Q20732848

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/