JONES, DAVID (1808 - 1854), gweinidog y Bedyddwyr, a golygydd

Ganwyd ym Mhenrhiwfach, Llanpumpsaint, 1808, yn fab i Benjamin ac Esther Jones. Codwyd ef i bregethu yn Ebeneser, Blaenafon, ac aeth i Goleg y Fenni yn 20 oed. Ordeiniwyd ef yn weinidog ei fam-eglwys yn 1832, a symudodd i'r Tabernacl, Caerdydd, yng Ngorffennaf 1834. Yno y bu hyd ei farwolaeth ar 8 Tachwedd 1854. Yn ystod ei weinidogaeth ym Mlaenafon priododd E. Thomas, Castell Nedd, a ganed iddynt ddau fab.

Etholwyd ef yn gyd-olygydd Ystorfa Weinidogaethol (wedi hynny Ystorfa y Bedyddwyr) yn 1838, a'r Bedyddiwr yn 1840. Cyhoeddodd Udgorn Jubili Cenhadiaeth y Bedyddwyr, 1844, a Y Drych Blynyddol, 1849. Cyfieithodd Cydymaith y Bibl (d.d.), yn ôl pob tebyg o waith y Parch. Ddr. Romeyn, Efrog Newydd, a golygodd yn 1839 ail argraffiad o Enoch Francis, Gair yn ei Bryd. Priodolir iddo hefyd holwyddoreg poblogaidd. Bu'n ysgrifennydd cymanfa Morgannwg, 1849-54.

Awdur

• Benjamin George Owens

Ffynonellau

• R. Evans, Life and Times of the Rev. David Jones, Baptist Minister, Tabernacle, Cardiff. Also forty of his skeleton sermons (Llanelli 1885)
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 73-5

Darllen Pellach

• Marwnad am y diweddar Barch. David Jones, Caerdydd, yr hwn a fu farw Tachwedd yr 8fed, 1854, yn 46 mlwydd oed (Caerdydd 1854?)

Dolenni Ychwanegol

• Wikidata: Q20738036

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/