JONES, JOHN (1761 - 1822), Edern, gweinidog gyda'r Methodistiaid Calfinaidd

Ganwyd yn Nhyddyn-Dafydd-Ddu, plwyf Llandwrog, Sir Gaernarfon, ond fe'i magwyd yn nhref Caernarfon hyd yn 17 oed, a bu yn ysgol un Thomas Brown. Anfonwyd ef i'r Wyddgrug i ddysgu gwaith eilliwr. Wedi dwy flynedd dychwelodd at ei deulu, a oedd erbyn hynny yn byw yn Amlwch, Môn. Argyhoeddwyd ef yn adeg ymweliad Dafydd Morris o'r Deheudir â Môn, a dechreuodd bregethu yn 1784. Gŵr cadarn, nerthol, ydoedd a'i weinidogaeth yn llym ac argyhoeddiadol. Sonnir amdano yn dychwelyd 180 mewn un oedfa. Pan oedd yn 35 oed priododd Mary Williams, etifeddes Penybryn, Edern, ac yno y bwriodd weddill ei oes. Ordeiniwyd ef yn 1814. Bu farw 9 Awst 1822.

Awdur

• Y Parchedig Richard Thomas, (1872 - 1950)

Ffynonellau

• Owen Thomas, Cofiant y Parchedig John Jones, Talsarn: mewn cysylltiad a hanes duwinyddiaeth a phregethu Cymru (Wrexham 1874), ii, 825
• Y Drysorfa, 1851, 159
• Methodistiaeth Cymru (1851–6), ii, 267
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 9-11
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• Geirlyfr Bywgraffiadol o Enwogion Cymru (1870), 607

Dolenni Ychwanegol

• Wikidata: Q20733496

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/