JONES, JOHN ('Idrisyn'; 1804 - 1887), clerigwr ac awdur

Ganwyd 20 Ionawr 1804 yn Nolgellau, mab William Humffrey, saer, ac Elizabeth. Yn 1818 fe'i prentisiwyd gyda Richard Jones, argraffydd a chyhoeddwr Yr Eurgrawn Wesleyaidd. Symudodd i Lanfair Caereinion gyda swyddfa'r Eurgrawn tua 1824, ac oddi yno aeth i Lanidloes. Yno yn 1830 y dechreuodd ar ei waith fel argraffydd a chyhoeddwr. Pregethai gyda'r Wesleaid a bu'n faer y dref yn 1852. Ym Medi 1853 fe'i hordeiniwyd yn ddiacon gan esgob Tyddewi a'i benodi'n gurad Llandysul, Sir Aberteifi. Daeth yn offeiriad ym Medi 1854 ac yn ficer Llandysiliogogo yn 1858. Yn 1881 cafodd bensiwn o'r 'Civil List.' Bu farw yn y Cei Newydd ar 17 Awst a'i gladdu yn Llandysiliogogo.

Cyhoeddodd tua 12 o lyfrau. Y mwyaf adnabyddus oedd Dehongliad Beirniadol ar yr Hen Destament a'r Newydd yn bum cyfrol (Llanidloes, 1852). Ymhlith ei lyfrau eraill ceir Yr Esboniad Beirniadol (6 chyfrol, Llanidloes, 1845) a'i gyfieithiad o ddyddlyfr y frenhines Victoria - Dalenau o Ddyddlyfr ein Bywyd yn yr Ucheldiroedd (Caerfyrddin, 1868).

Awdur

• Elwyn Evans

Ffynonellau

• Y Geninen, Mawrth 1889
• Yr Haul, Medi 1887
• H. Blackwell, NLW MSS 9262A: A Dictionary of Welsh Biography

Darllen Pellach

• Erthygl Wicipedia: John Jones (Idrisyn)

Delweddau

• LlGC: John Jones, 'Idrisyn'
• John Price, John Jones, 'Idrisyn'

Dolenni Ychwanegol

• VIAF: 1781743
• Wikidata: Q18671898

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/