JONES, JOHN (1837 - 1906), gweinidog gyda'r Methodistiaid Calfinaidd, a llenor

Ganed fis Rhagfyr 1837 yn fab i George Jones, Abercin (Abercain), Llanystumdwy - gweler Trafodion Cymdeithas Hanes Sir Gaernarfon, 1945, 46-8, 54, a'r ach yn J. E. Griffith, Pedigrees, 211 (er nad yw'r gainc neilltuol hon ynddi).

Bu'n was mewn siopau dillad yng Nghaernarfon a Llundain, ond dechreuodd bregethu ac aeth i Goleg y Bala yn 1861. Ordeiniwyd ef yn 1863, ond ar wahân i gyfnod byr (1872-8) pan oedd yn fugail Capel y Graig gerllaw Bangor, ni bu'n fugail eglwys.

Priododd â merch i David Jones, Treborth. Bu am rai blynyddoedd ar ôl 1878 yn oruchwyliwr banc preifat (teuluol) 'Pugh, Jones & Co.' ym Methesda, ond dychwelodd i Bwllheli (lle'r oedd wedi byw cyn mynd i'r Graig), ac yno y bu farw, 19 neu 20 Mehefin 1906; yn Glanadda, Bangor, y claddwyd ef.

Yr oedd yn weddol dda ei fyd; teithiodd lawer; ymhoffai mewn daeareg a daearyddiaeth, a sgrifennodd lawer ar y pynciau hyn i'r Traethodydd. Cyhoeddodd hefyd gofiannau i ddau weindog hynod, Michael Roberts o Bwllheli a John Jones, Bryn'rodyn.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• J. Jones ('Myrddin Fardd'), Enwogion Sir Gaernarfon (1922)
• Y Geninen (Gwyl Dewi), 1907

Dolenni Ychwanegol

• Wikidata: Q20821433

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/