JONES, DAVID (1805 - 1868), Treborth, Sir Gaernarfon, gweinidog gyda'r Methodistiaid Calfinaidd

Ganwyd 2 Mehefin 1805 yn Nolwyddelan, yn frawd i John Jones ('Talysarn'). Cyn dechrau pregethu yn y flwyddyn 1826 ni chawsai gyfle addysg ond yr ysgol Sul. Ar ôl hynny aeth i ysgol John Hughes yn Wrecsam. Wedi ei ddyfod i fyw i Gaernarfon yn 1832 priododd wraig weddw, sef Mrs. Owen, Siop-y-pendist. Ordeiniwyd ef yn y flwyddyn 1834 a gwasnaethodd eglwys Moriah yn ogystal ag eglwysi eraill yn y dref (1832-58). O 1858 hyd 1867 preswyliai yn Nhreborth. Bu farw yn Llanfairfechan wedi ychydig fisoedd o aros yno, ar 23 Mehefin 1868.

Perthynai iddo urddas a lledneisrwydd bonheddig, ac fel pregethwr fe'i rhestrid yn y dosbarth cyntaf oblegid ei ddawn gyfoethog a melys. Nid oedd ei weinidogaeth mor hyrddiol a'r eiddo ei frawd, ond dywedir bod ei bregethu yn fwy gwastad a'i genadwri liwgar yn effeithiol i ennill. Ceir llawer o'i gynhyrchion mewn rhyddiaith a barddoniaeth, yn bennaf yn Y Drysorfa a'r Traethodydd. Ei waith pennaf mewn rhyddiaith oedd Perffaith Gyfraith Rhyddid, ac, mewn barddoniaeth, Dyn, yn ei Greadigaeth, ei Ddirywiad, a'i Adferiad yn y dyn Crist Iesu. Canodd gryn lawer ar destunau ysgrythurol, ac y mae amryw o'i emynau yn dra hysbys. Yn y flwyddyn 1876 cyhoeddwyd dwy gyfrol o'i bregethau.

Awdur

• Y Parchedig Richard Thomas, (1872 - 1950)

Ffynonellau

• David Griffith, 'Beirdd a Barddoniath Gymreig y Bedwaredd Ganrif ar Bymtheg: I - Y Parchedig David Jones, Treborth,' Y Traethodydd, 1903, 426-429
• D. D. Williams, Llawlyfr Hanes Cyfundeb y Methodistiaid Calfinaidd (Caernarfon 1927), 204, 205
• J. Thickens, Emynau a'u Hawduriaid (1945), 39
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)

Darllen Pellach

• David Jones, David Charles Evans (gol.), Adgofion am y diweddar Barchedig David Jones, Treborth; yn cynwys crynhodeb o hanes ei fywyd (Dolgellau 1886)

Delweddau

• John Thomas, Rev. David Jones, Treborth
• LlGC: Parch. David Jones, Caernarvon
• John Thomas, Er coffadwriaeth am y Parch. David Jones, Treborth bu farw Mehefin 23, 1868 yn 62 (oed)

Gweithiau

• David Jones, Owen Thomas, John Parry, Cofiant y Parchedig John Jones, Talysarn (Efrog Newydd 1868)

Dolenni Ychwanegol

• Wikidata: Q20732849

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/