JONES, LEWIS (1793 - 1866), clerigwr

a phennaeth yr ' Association of Welsh Clergy in the West Riding of Yorkshire '; ganwyd 14 Chwefror 1793, mab William a Mary Jones, Penpontbren, Llanfihangel-genau'r-glyn, Sir Aberteifi. Addysgwyd ef yn Ystrad Meurig yn nyddiau John Williams ('Yr Hen Syr'). Wedi hynny bu'n athro yn ysgol ramadeg Clitheroe, sir Lancaster. Cafodd ei benodi i fywoliaeth Almondbury, ger Huddersfield, 1822; yr oedd hefyd yn ' gurad parhaol ' Llandevaud, Mynwy (1822-52). Manteisiodd ar ' Offrwm Diolch ' (Million Act) y Llywodraeth i adeiladu 18 o eglwysi newydd, ysgolion, a phersondai, a daeth i'w adnabod gan y Saeson fel ' The Church building parson.' Fel nawddogwr ei blwyf mawr, a'i sêl dros Gymru, penododd glerigwyr Cymreig i'r holl fywiolaethau newydd. Ail-luniodd ' Gymdeithas y Clerigwyr Cymreig ' (1835) a gychwynasid yn 1821, a bu'n llywydd iddi am 30 mlynedd i'r diwedd. Bu farw 26 Awst 1866.

Awdur

• Y Parchedig Daniel Williams, (1878 - 1968)

Ffynonellau

• Journal of the Welsh Bibliographical Society, 1929, 250
• C. A. Hulbert, Annals of the Church and Parish of Almondbury, Yorkshire (Llundain 1882-85), 79-80
• Enwogion Ceredigion (1869)

Dolenni Ychwanegol

• Wikidata: Q20733787

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/