JONES, RICHARD (1603? - 1673), ysgolfeistr a chyfieithydd gweithiau crefyddol

Mab John Lewis o Lansannan, sir Ddinbych. Addysgwyd ef yng Ngholeg Balliol, Rhydychen, a graddiodd yn B.A., Chwefror 1628-9, ac M.A., Mehefin 1633. Tan y Weriniaeth daeth yn bregethwr teithiol, ac yn ddiweddarach yn ysgolfeistr Ysgol Rydd Dinbych. Gwyddys iddo gael ei apwyntio i ysgol Dinbych cyn Chwefror 1656-7, o bosibl ychydig cyn hynny. Diswyddwyd ef yn 1660. Bu farw Awst 1673. Y cyntaf o'i gyfieithiadau i'w gyhoeddi oedd Galwad i'r Annychweledig, 1659, o Call to the Unconverted Richard Baxter. Mewn cyfrol amrywiol a gyhoeddwyd gan Stephen Hughes yn 1672 ymddangosodd ei Rhodfa Feunyddiol y Christion, cyfieithiad o Christian's Daily Walk Henry Oasland, ac Amdo i Babyddiaeth, o A Winding sheet for Popery Richard Baxter. Ymddangosodd Hyfforddiadau Christionogol, cyfieithiad o Christian Directions Thomas Gouge, yn 1675 ar ôl ei farw, ac hefyd Bellach neu Byth, cyfieithiad o Now or Never Baxter, yn 1677.

Awdur

• Griffith Milwyn Griffiths

Ffynonellau

• Foster, Alumni Oxonienses: the members of the University of Oxford
• Thomas Shankland, 'Cynnyg i Benderfynu Hen Ddadl Lyfryddol'
• T. Richards, A History of the Puritan Movement in Wales (1920) a Religious Developments in Wales, 1654–1662 (1923)
• J. C. Morrice, Wales in the Seventeenth Century its literature and men of letters and action (Bangor 1918)
• H. Lewis yn Trafodion Anrhydeddus Gymdeithas y Cymmrodorion, 1930-1
• T. Parry, Hanes Llenyddiaeth Gymraeg hyd 1900 (1944)
• Thomas Rees, History of Protestant Nonconformity in Wales from its rise in 1633 to the present time (London 1883)

Dolenni Ychwanegol

• VIAF: 38319884
• Wikidata: Q18672103

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/