JONES, THOMAS (1720? - 1790), clerigwr ac awdur

Ychydig a wyddys am ei fywyd. Penodwyd ef yn ficer Pennant, Sir Drefaldwyn, yn 1757. Bu'n rheithor Llangynog, 1762-82, ac yn rheithor Hirnant, 1782-90. Yn 1763 cyhoeddwyd ei Rheol o Addoliad ac Ymarfer Duwioldeb i'r Hwsmon - sef cyfieithiad o ddarlithiau yr archesgob Thomas Secker, Rule of Worship and Practice of Piety for the Husbandman. Cyhoeddodd hefyd gyfieithiad o waith arall gan Secker sef Traethiadau ar Gatecism Eglwys Loegr: gyda phregeth ar Gonffirmasiwn, 1778. Y gwaith olaf a gyhoeddodd oedd Pregeth ar Salm CXIX, 165, yn 1779. Yn ôl cofrestr plwyf Hirnant fe gyfieithodd yn 1784 Drych y Prif Oesoedd gan Theophilus Evans, ond nid ymddengys iddo gyhoeddi'r cyfieithiad. Bu farw yn 1790 a'i gladdu ym Mhennant 17 Gorffennaf.

Awdur

• Elwyn Evans

Ffynonellau

• R. Williams, Montgomeryshire Worthies (1894)
• Charles Ashton, Hanes llenyddiaeth Gymreig o 1651 O.C. hyd 1850 (1893)

Dolenni Ychwanegol

• Wikidata: Q20734479

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/