JONES, THOMAS (1818 - 1898), clerc plwyf

Llanfaethlu, sir Fôn. Bu'n byw yn Tynllan ac yn Newhavren, Llantrisant, sir Fôn, cyn dyfod yn glerc plwyf Llanfaethlu. Haedda ei goffáu yn rhinwedd y casgliad helaeth o lawysgrifau cerddoriaeth a ysgrifennodd ef â'i law ei hun neu a gynhullodd, casgliad o dros ddeugain o gyfrolau a roddwyd i Lyfrgell Genedlaethol Cymru yn 1919 gan yr archdeacon Albert Owen Evans. Er mai mewn caniadaeth eglwysig a chynulleidfaol yr ymddiddorai Thomas Jones fwyaf, ceir yn y casgliad hwn (NLW MS 8112-52 ) enghreifftiau o gerddoriaeth arall hefyd, gan gynnwys caneuon gwerin, rhanganau, caneuon. Y mae o werth am fod ynddo esiamplau o waith cynifer o gerddorion hysbys a llai hysbys, llawer ohonynt yn gyfoeswyr â Thomas Jones. Bu farw 25 Mawrth 1898.

Awdur

• Syr William Llewelyn Davies, (1887 - 1952)

Ffynonellau

• Handlist of Manuscripts in the National Library of Wales. ii, 12-6,

Dolenni Ychwanegol

• Wikidata: Q20734484

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/